Sikula Rakyat

Oleh: Nurman Syamhas

Deungon Bismillah kisah lon surat
Deungon nama Zat Allah Taala
Allah Taala kuasa Neu that
Hana sapat me ta peusa

Geutanyo insan sinan ta mumat
Mangat seulamat akhirat donya
Rata jeub watee peureulee ta ingat
Akan Hazarat Allah Taala

Ta pubut suroh peujeuoh laknat
Jalan syariat wajeb keureuja
Malam ngon uroe bek tuwoe ibadat
Wajeb ngon sunat saban ta jaga

Seumbahyang limong beukeunong ayat
Beu kukhuk that watee ta baca
Disinan punca sigala ibadat
Wajeb ta ingat wahe syaidara

Ohlheuh ta pujoe sidroe Hazarat
Ateuh Muhammad seulaweut ta baca
Seulaweut salam ateuh Muhammad
Panghule ummat yang ache masa

Soe meuseulaweut ateuh Muhammad
Pahala leu that Tuhan karoenya
Uleh seubabnyan rakan ngon sahbat
Barang jan saat sulaweut ta baca

Moto geureubak dijak u barat
Jiba meuneukat kuphi ngon saka
Ta puwoe haba bak punca ayat
Bek sampoe silab han meuhoe punca

Yoh jameun dilee peureulee ta ingat
Sikula rakyat goh lom meurata
Didalam kota na saboh sapat
Jeuoh leupah that bak jak sikula

Beudoh Jak Sikula

Oleh : Nurman Syamhas

Assalamualaikom kawom jeunulang
Inong ngon agam tuha ngon muda
Timu ngon barat barangpat saban
Saleum lon tuan tinggai di Banda

Dua blah jaroe sigoe lon layang
Keuwareh rakan keumun ngon Apa
Nyoepat na lon ba sibanja nazam
Beudoh beureujang neu cok neu baca

Keubhah sikula haba kon karang
Donya peundidikan ulon calitra
Wasit Panghulee yang akhe zaman
Inong ngon agam wajeb sikula

Tuntut ileumee pareulee hanban
Dari ayonan sampoe an tuha
Meunyoe yah ngon ma haba keumampuan
Antat beureujang ubak ulama

Keudeh bak guree neu mee beureujang
Ngat ji turi Tuhan ayah ngon Poma
Uroe akhirat ka meuhat seunang
Hana Geu reundam dalam nuraka

Disampeng kajeut ji beut Al Qur’an
Beuna lam badan ileumee donya
Donya akhirat beu ji tupat jalan
Meunan geu peusan uleh Saidina

Dari Esde beusampe keperguruan
Neu mita jalan pakriban cara
Mangat nanggroe na soe peutimang
Inong ngon agam kajeut keusarjana

Le peumeuritah geu peuhah jalan
Wajeb na peundidikan sampoe SMA
Sabe geunap thon geu peutron anggaran
Donya peundidikan bekle teulanta

Bandum guru timu seulatan
Jinoe ka seunang kana beulanja
Bandum siswa hana keunong iyuran
Rata bidang kama biaya

Meunyona sikula peuget sumbangan
Lapor beureujang keudeh bak Jaksa
Dua ploh persen peng geu anggarkan
Bekna le alasan hansep biaya

Hai ureung gampong neutron beureujang
Bandum aneuk badan antat sikula
Bekle neu ingat paneuk ngon panyang
Soai anggaran le peumeurintah ka geu seudia

Kon lagee dilee teuntee ta keunang
Keunong iyuran rata sikula
Ramee aneut mit yoh masanyan
Inong ngon agam putoh sikula

Ohnoe mumada haba lon karang
Watee laen jan ta sambong teuma
Leubeuh lom jeulah lon peugah nazam
Donya peundidikan memang luar biasa

Jak Beut Bak Dayah

Oleh : Nurman Syamhas

Surah ta puphon langsong ngon Bismillah
Alhaldulillah nyoeka seumpurna
Seulaweut taba bekna meu ilah
Keu Rasulullah Panghulee Ambiya

Beureukat Muhammad nikmat meulimpah
Neu bri le Allah ateuh rung donya
Panghule umat yang that amanah
Hantom Neu keubah sikrak rahsia

Yoh mantong hudep Rasulullah
Sabe Neu peugah bak sahbat dumna
Neu yu jak tuntut ileumee Allah
Bah jarak leupah u nanggroe Cina

Nyan kheuh seubab sahbat meutuah
Sinoe lon peugah dua lhee kata
Beudoh jak mita rata daerah
Patna meugah teungku ulama

Lon tuleh haba lewat majalah
Rakan meutuwah beudoh neu baca
Majalah Rahmat manfaat leupah
Beurita geu ulah meu bagoe rupa

Alumni IAIN sinan berkiprah
Sarjana ceudah bidang agama
Bak ulon tuan yu karang kisah
Lam bahsa daerah geu yu meurika

Amma bakdu teungku meutuwah
Ngon izin Allah kisah ta rika
Beureukat doa poma ngon ayah
Beu lheuh lon kisah ngon samporeuna

Aceh lhee sagoe seuramoe makah
Nanggroe metuwah pusaka kaya
Bandum geutanyoe jinoe na tugah
Peuhudep dayah lagee yang ka-ka

Di Aceh Timu meusyeuhu leupah
Yohgoh troh langkah kaphe Beulanda
Masa Iskandar Muda mat peurintah
Sinan na dayah di Cot Kala

Ramee ulama dum ceudah ceudah
Luloh dari Dayah bidang agama
Ohka tamat beurangkat bagah
Ho laen daerah jak syiar agama

Jak ba agama rata daerah
Ladom troh langkah u pulo Jawa
Martabat Aceh leubeh seubab na Dayah
Lahe ulama ceudah masa Iskandar Muda

Kayeem ta deungoe rakan meutuah
Kegiatan Dayah rata jeub kota
Lamdom Pasantren geuboh istilah
Lamdom meunasah meunyoe di Desa

Pemda Aceh ka leubeh ceudah
Geubina dayah rata jeub kota
Ngon DPRA buka musyawarah
Bandum deyah anggaran bakna

Geu beuntuk Badan yang peutimang deyah
Hana le geu seurah bak Kanwil Agama
Pemda keudroe peutimang amanah
Peukeumang dayah beu leubeh bak nyangka

Mangat dudoe nanggroe seuramoe makah
Beu jiwoe marwah lage nyang ka ka
Rata sagoe ta deungoe gah
Ulama ceudah yang muda muda

Sumber daya manusia raya paedah
Lulusan dayah leupah meuguna
Nyan kheuh dudoe adoe meutuwah
Seuramoe Malah nyang peutimang teunte ulama

Aneuk geutanyoe jinoe ta papah
Ta jok bak dayah agam ngon dara
Tamat disinan bak IAIN bagah
Tamong kuliah jak cok sarjana

Tamat IAIN beken sileupah
Jeut beut khoseubah rata jeub desa
Peukong syariat secara kaffah
Peusan Rasulullah peumaju agama

Ohnoe mumada haba lon kisah
Manfaat dayah keu aneuk bangsa
Beudoh ta sambot hai rambot mirah
Program peumeurintah wajeeb ta jaga

Pesanteren terpadu pih meusyeuhu leupah
Sama ngon Dayah teumpat cetak ulama
Beudok ta dukong program peumeurintah
Ngon izin Allah Aceh beu jaya teuma